اليومين دول بقى الوعد بالنسبة للناس مجرد كلمة سهلة اوى بتتقال .. و على عكس زمان .. الكلمة كانت ميثاق بناخد بيه و بنتفق بالكلمة .. لكن دلوقتى ممكن واحد يقولك " أوعدك " .. و هو فى سره بيقول ابقى قابلنى لو عملت كدا ..
و المشكلة انك زى العبيط بتصدق .. و دا لأنك مازلت عايش فى زمن الحرملك و الثقه العمياء اللتى بتديها لكل الناس سواسية .. و بعد كل اللى بيحصلك مابتحرمش ..
من كام يوم كدا اتفقت مع واحد صاحبى انى لازم اشوفه كمان كام يوم عشان فيه موضوع مهم جدا لازم نتكلم فيه .. و هو كالعادة بعادته الطفولية ماقدرش يستنى .. و فضل يلح عليا لحد ما قولتله الموضوع ايه .. و كان الموضوع محتاج منه تفكير عميق .. لأنه موضوع جدى جدا على عكس كل اللى كان بيدور بيننا من حوارات ..
و طبعا انا واثق فيه زى ما واثق فى صوابع ايدى .. و قولتله هستناك يوم كذا عشان نكمل كلامنا .. قالى معلش مش هقدر ورايا حاجات كتير اوى .. رديت عليه بثقه و قلتله انت لو عاوز تعمل اى حاجه بتعملها ..
و الكلمة كأنها ثبتته .. رد عليا و قالى " دايما بتعرف تثبتنى .. حاضر يا سيدى هكون موجود " .. سألته " وعد ؟؟!! " .. رد عليا و قالى " و الله وعد " ..
" طيب هتفكر فى الموضوع اللى قولتلك عليه ؟؟ " .. " اه و الله هفكر .. اوعدك " ..
شوفتوا كام حلفان و كام وعد ؟؟
و بعد مرور المدة اللى اتفقنا عليها و قبل انتهائها مش عارف ايه اللى جاب فى دماغى انى اشوف الإيميل بتاعه عندى .. و لقيته مدينى بلوك .. و خلصت المدة ولا وصلنى اى رد ..
و طبعا الحالة اللى انا دايما متعود عليها و هى الإكتئاب هى اللى اصابتنى .. و خيبه الأمل فى الشخص دا ..
هو العيب فيا انى بصدق الكل ؟؟ .. متهيألى اه . و متهيألى الشخص دا بالذات غلط انى اصدقه .. و هو دا اللى المفروض اعمله بعد كدا .. و لا ايه ؟!!
